በስመ አብ ወወልድ ወመንፈስ ቅዱስ አሐዱ አምላክ አሜን!!!
እንኳን ለብርሃነ መስቀሉ በሰላም አደረሳችሁ!
ደብረሰላም መድኃኔዓለም የኢትዮጵያ ኦርቶዶክስ ተዋህዶ ቤተክርስቲያን የጌታችን የመድኃኒታችን የኢየሱስ ክርስቶስን ወንጌል ለማዳረስ ያለ ማቋረጥ አገልግሎት እየሰጠች ትገኛለች። ይህንን ተልእኮዋን ከግብ ለማድረስ እኛ ልጀቿም ፍጹም መንፈሳዊ በሆነ ትጋት ከጎኗ በመሆን ልናገለግል ይገባል። የሰው ልጅ አንዱ የተፈጠረበት ዓላማም አገልግሎት በመሆኑ ጊዜን፣ ገንዘብን፣ ጉልበትን እና ዕውቀትን ለእግዚአብሔር ለመስጠት ፈጽሞ ቸል ልንል አይገባንም። ለዚህም ነው በመጽሐፍ “ ታገለግሉት ዘንድ መርጧችኋል እና ቸል አትበሉ::” (መዋ.ዜና.፳፱፥፲፩) ተብሎ የተጻፈልን። ዛሬም እዚህ የተሰበሰብንበት አላማ ይኸው ነውና የረዳን አምላካችን ክብር ምስጋና ይግባው።
የነገዋን ቤተ ክርስቲያን የተሻለችና ለትውልዱ እስከ ሙሉ ክብሯ እንድትተላለፍ ቅድሚያ ሰጥተን መሥራት ካሉብን በርካታ ጉዳዮች አንዱ በቂ እና ምቹ አብያተ ክርስቲያናትን በተለያዩ አካባቢዎች ማስፋፋት እንደመሆኑ መጠን በሚኒሶታ የምንሰራው ህንጻ ቤተክርስቲያን እንደአብነት የሚጠቀስ ይሆናል።
የዚህንም አመት መስቀል በዓልን ስናከብር እግዚአብሔር በስደት አገር አብዝቶን ቤቱን ለመስራት ከቋፍ ላይ በመሆናችን በታላቅ ደስታ እና የምስጋና መንፈስ ነው። ጳጉሜን 2, 2016 (September 7, 2024) ብጹዕ አባታችን አቡነ ቴዎፍሎስ የካሊፎርንያና አካባቢው ሃገረ ስብከት ሊቀጳጳስ የቅዱስ ሲኖዶስ አባል በተገኙበት ለአዲሱ ሕንጻ ግንባት የቁፋሮ ጅማሬ ስነስርዓት በተካሄደበት ወቅት ከሁለት መቶ ሺህ ዶላር በላይ ተሰባስቧል። የግንባታ ሂደቱን ለመስጀመር የሚያስፈልጉ ቅድመ ሁኔታዎች ማለትም ንድፍ ስራ መጠናቀቅ፤ ከህንጻ ተቋራጭ ጋር ስምምነት ማካሄድ እንዲሁም ከከተማ ምክር ቤት ፈቃድ ማግኘትን የመሳሰሉ ጉዳዮች የተሟሉ ሲሆን የግንባታ ሂደቱም እግዚአብሔር ቢፈቅድ በጥቅምት ወር (October 2024) ተጀምሮ በሚቅጥለው አመት ሐምሌ (July 2025) ይጠናቀቃል ተብሎ ይጠበቃል።
በዚህ አጋጣሚ የሚኒሶታ እና አካባቢው ምዕመናን የዚህ ታላቅ አላማ አካል በመሆን ከበረከቱ እንድትሳተፉ ጥሪያችንን እናስተላለፋለን።
ወስብሐት ለእግዚአብሔር
አድራሻችን: 4401 Minnehaha Avenue S., Minneapolis, MN 55406, U.S.A.
ስልክ: +1(612) 721-1222
ኢሜይል: dsmachurch@gmail.com
ዌብሳይት: https://www.debreselam.net
ፌስቡክ: https://www.facebook.com/Debreselameotc/